خليك مدير شاطر قبل ما تطلب من الموظف إنه يكون شاطر

أحسن مدير ممكن تشتغل معاه هو المدير اللي بيقدر يغير من اسلوب ادارته حسب الموقف .. وهي دي اساليب -ستايلات- الإدارة المتعارف عليها

اولاً .. الأسلوب التوجيهي الإجباري (المدير القوي)
وده المدير اللي دايماً بيقولك جملة واحدة بس .. إعمل زي ما بقولك .. هي بتتعمل كده .. لو معملتش كده هيبقي في خصم
طبعاً ده اسلوب كويس في حالة الأزمات ولما يكون مسار الشركة منحرف تماماً .. بس عيوبه إن لو موظفينك مش مؤهلين أوي فمش هيتعلموا اي حاجة ويفضلوا زي ما هم .. ولو مؤهلين فهيجيلهم إحباط أكيد بسبب طريقة الإدارة

ثانياً .. الأسلوب الواثق ( المدير اللي شايف المستقبل )
وده المدير اللي دايماً عينه على الرؤية بتاعت الشركة والمدي الطويل للأهداف وبينقل ده لكل الموظفين .. فدايماً تلاقيه مدير عادل بس حازم، وبياخد بإيد الموظفين تجاه الأهداف المطلوبة، وطريقة في تحفيز الموظفين بتبقي عن طريق الإقناع بأهمية الوظيفة والإهتمام بالفيدباك
طبعاً ده اسلوب مفيد جداً في حالة احتياج الشركة لزرع الثقة بالموظفين عن طريق المدير واحتياج الشركة لتوضيح المسار والأهداف للموظفين وجعلهم يؤمنون بها .. بس عيوبه ان المدير لو مكسبش ثقة الموظفين فبالتالي الموظفين مش هيؤمنوا برؤية الشركة وكمان لو الموظفين مش مؤهلين فهيحتاجوا مدير يوجههم تيكنكال مش بس بالرؤية وكلام المستقبل

ثالثاً .. الأسلوب التمهيدي (المدير الكيوت حبيب الكل)
وده المدير اللي عنده الموظفين (ناسه حبايبه) أولاً بعد كده الشغل أين كان .. مبيحبش الخناق ابداً ودايماً صاحب الكل فـ الشغل مهما كانت الظروف بيخلي الكل مبسوطين
طبعاً ده مدير كلنا هنحبه بس لو مدير اشتغل بالاسلوب ده بس يبقي قول على الشركة السلام .. لأن المدير ده شاطر أوي لما يجمع مع الأسلوب التمهيدي أساليب تانية تمشي الشغل .. ويبقي هو المدير المطلوب لما يكون الشغل روتيني والناس زهقانة من الشغل .. وعيبه إن في مواقف بتحتاج حزم وتوجه إداري معين هو مبيعملهاش .. وكمان إن الأداء بيتأثر بشكل سلبي بسبب طريقة إدارته

رابعاً .. الأسلوب الديمقراطي ( يلا نشتغل سوا)
المدير ده عنده كل الموظفين زيه تمام لازم يبقي عندهم نفس المعطيات والمعلومات عشان بيشركهم فـ القرارات وده بيخليهم متحمسين جداً للشغل معاه
الأسلوب ده مفعوله هايل لأنه بيخلي الموظفين شغالين مع بعض فـ تناغم بمعني الكلمة وبيئة العمل بتكون إيجابية وثابتة وده بيمنح الموظفين ثقة وخبرة كبيرة ... وعيوبه لما بيبقي في أزمة خطيرة ومفيش وقت لإجتماعات او مشاركة .. وكمان لو في موظف كفاءته قليلة هيتطلب توجيهات عن قرب بأسلوب إداري مختلف

خامساً .. أسلوب القدوة ( بص عليا انا هعمل التاسك ازاي)
المدير ده دايماً مهووس بإنه يعلم موظفينه الشغل بإنه يعمله بنفسه بأحسن وأسرع طريقة فيعلي مقاييس الأداء بشكل كبير فـ الشركة .. وده بيخليه دايماً متوقع من الموظفين إنهم يشتغلوا بنفس الطريقة وده اللي بيخليه مقتنع إن التحفيز للموظفين بيبقي عن طريق مقاييس الأداء العالية
كتير مننا هيحبوا يشتغلوا مع المدير ده عشان المنافسة العالية فـ التيم وإن كل واحد يبين خبرته وكفاته خاصة وإن التوجيه من المدير بيكون قليل .. فكل موظف بيكون مسئول عن نفسه ... إنما عيوب المدير ده بتبان لو التيم محتاج تدريب أكتر من التحفيز أو لما يكون حجم الشغل كبير على شخص لوحده

سادساً .. أسلوب المدرب (بابا)
المدير ده هو المدرب بتاعك .. عامل زي باباك أو مدرب السباحة .. دايماً بياخد بإيدك ويساعدك ويشجعك فـ الشغل بفرص الترقيات وخلافه وبتلاقيه بيركز معاك على نقاط قوتك اكثر من نقاط ضعفك
طبعاً المدير ده الأمثل لما يكون التيم في الشركة محتاج تدريب ورفع كفاءة .. وعلى قد ما هو أسلوب جميل إلا إن له أكثر من عيب أولهم هو لو المدير ده مكنش بالكفاءة المتوقعة منه التيم هيفشل .. وثانياً لو في موظف ادائه ضعيف لدرجة إنه لازم يمشي من الشركة، هتلاقي المدير ده بيحارب عشان يخليه أين كانت التوابع

اخيراً .. المدير الشاطر اللي بيجمع بين الاساليب الادارية دي في المواقف المختلفة ومع الموظفين بإختلاف شخصياتهم .. والمدير الفاشل اللي بيمشي على نمط مش بيغيره لأنه بيحبه ... وهي دي الجملة اللي احنا بنقولها فـ مصر إن ده هو المدير المصري