خدعوك فقالوا .. حياتك العملية تبدأ بعد الجامعة

كلنا فـ مرحلة الجامعة بنتعرض لضغوطات إنهاء المرحلة الدراسية والحصول على مجموع مُحترم وبعدين التفكير فـ الحياة العملية بعد التخرج .. وللأسف هذا ما وجدنا عليه اباؤنا

حياتنا بتبدأ بالاختيارات اللي بناخدها وطبعاً كل مرحلة ولها اختياراتها بس مرحلة الجامعة وإنهاء الدراسة هي الأهم لأنها هتحدد بنسبة كبيرة هتعمل ايه باقي حياتك؟ وهنا بتظهر نظرية الإذعان في أبهي صورها .. والإذعان هو إنك بتسلم نفسك للإتجاه السائد في المجتمع بدلاً من مخالفته وبكده هتكون نسخة جديدة من الناس اللي قبلك .. فمثلاً تجارة يعني محاسبة .. طب يعني القمة .. هندسة يبقي مدني او معماري ومؤخراً كهربا .. اداب يبقي لغات او فلفسة وعلم نفس .. وقلة قليلة اصلاً اللي بتشتغل بكليتها

لو انت هتتخرج من الجامعة قريب .. فبنصحك بأكتر من حاجة .. واكتر حد هيستفيد من الكلام ده اللي لسه فـ سنة أولي وتانية:

اولاً: اهرب من الوظائف الحكومية
واياك تمشي ورا جملة إن فاتك الميري إتمرمغ فـ ترابه .. ماهو فـ الأول والأخر تراب .. استفدت انت ايه يعني ؟! هيجيلك حساسية على الصدر

ثانياً: اجمع قطع البازل
مش هنقعد نلعب .. لأ لو إنت بتحلم بفكرة معينة او مشروع معين .. ذاكره واقرا وادرسه من دلوقتي وابدا كون علاقات عشان مشروعك وخلي حواليك الناس اللي هتدعمك وبس

ثالثاً: استثمر في تغذية خبراتك الإنسانية
الخبرة عمرها ما كانت سنوات العمل وبس .. الخبرة الحقيقة هي الخبرة الإنسانية .. لازم تفتح دماغك على ثقافات جديدة ومواقف مختلفة ودروس تتعلمها من مجالات مختلفة

رابعاً: إجعل الزواج ضمن أول 5 أهداف في حياتك
رجالة كتير بيهربوا من الزواج والمسئولية ويقولك انا بطولي احسن عشان لو المشروع فشل او انا ملقتش شغل محدش يتبهدل معايا .. نصيحتي ليك إنك تخلي الزواج هدف مهم من أول 5 اهداف بعد التخرج لأنه استقرار .. ومفيش راجل بينجح الا لو مستقر نفسياً .. وكده كده لو انت اخترت زوجة صالحة تشاركك احلامك وهكذا فتوكل على الله

خامساً: متبقاش ثور فـ ساقية
الشغل مش كل حاجة .. عايز تنجح فـ حياتك اشتغل من 9 الي 5 وبس كده .. انما الشركات اللي بتسخرك طول اليوم شغال وبيستغلوا شبابك مش هيفيدوك لما تكبر .. خلي دايماً عندك وقت بره الشغل لهواياتك وحياتك ..وحتي لو انت قلبك على الشغل اوي كده ومش مقتنع بالكلام ده، صدقني هواياتك هتزيد من قدرتك على الشغل اصلا

اخيراً .. استثمر فـ نفسك وفـ نفسيتك